Վերաբնակեցման և հայրենադարձության "Քաշաթաղցիներ" հասարակական կազմակերպություն: ԽՈՐՀՈՒՐԴ

Հաստատված է «Քաշաթաղցիներ» ՀԿ հիմնադիր ժողովում

20 մարտի 2012 թ.

ԿԱՐԳ

ՎԵՐԱԲՆԱԿԵՑՄԱՆ ԵՎ ՀԱՅՐԵՆԱԴԱՐՁՈՒԹՅԱՆ

«ՔԱՇԱԹԱՂՑԻՆԵՐ»

ՀԱՍԱՐԱԿԱԿԱՆ ԿԱԶՄԱԿԵՐՊՈՒԹՅԱՆ ԽՈՐՀՐԴԻ ԸՆՏՐՈՒԹՅԱՆ, ԽՈՐՀՐԴԻ ՀԱՄԱԿԱՐԳՈՂԻ ՆՇԱՆԱԿՄԱՆ ԵՎ ՏՆՕՐԵՆԻ ԸՆՏՐՈՒԹՅԱՆ

1.Վերաբնակեցման և հայրենադարձության «Քաշաթաղցիներ» հասարակական կազմակերպության (այսուհետ` Կազմակերպություն) խորհուրդն (այսուհետ` Խորհուրդ) ընտրում է Կազմակերպության ժողովը (այսուհետ` Ժողով):

2.Խորհրդի անդամների թիվը որոշում է Ժողովը` յուրաքանչյուր ընտրությունից առաջ` բաց քվեարկությամբ:

3.Ժողովի վճռական ձայնով մասնակիցներն առաջադրում են Խորհրդի անդամների թեկնածուներին: Եթե առաջադրված թեկնածուների թիվն ավելի քիչ է, քան Ժողովի կողմից որոշված Խորհրդի անդամների թիվը, ապա Խորհրդի անդամների թիվը սահմանող որոշումը չեղյալ է համարվում և Խորհրդի անդամ են դառնում բոլոր առաջադրված թեկնածուները: Եթե առաջադրված թեկնածուների թիվը հավասար է Ժողովի կողմից որոշված Խորհրդի անդամների թվին, ապա Խորհրդի անդամ են դառնում բոլոր առաջադրված թեկնածուները: Եթե առաջադրված թեկնածուների թիվն ավելին է, քան Ժողովի կողմից որոշված Խորհրդի անդամների թիվը, ապա առաջադրված թեկնածուներից Խորհրդի անդամներ են ընտրվում փակ քվեարկությամբ:

4.Փակ քվեարկությանը մասնակցում են Ժողովի վճռական ձայնով մասնակիցները:

5.Քվեարկությունը կազմակերպվում է հետևյալ ձևով.

-քվեարկողներից յուրաքանչյուրը կարող է քվեարկել Ժողովի կողմից որոշված` Խորհրդի անդամների թվին հավասար թվով թեկնածուների օգտին: Այսինքն` քվեարկողներից յուրաքանչյուրն ընտրում է ոչ թե Խորհրդի մեկ անդամի, այլ Խորհրդի կազմը:

-քվեարկողների նշած Խորհրդի կազմի յուրաքանչյուր ձայնը համարվում է մեկ ձայն:

-թեկնածուների անունների հերթականությունը չի համարվում տրված ձայնի առաջնահերթություն:

-քվեարկությունից հետո հաշվարկվում են թեկնածուների ստացած ձայները: Խորհրդի անդամներ են դառնում այն թեկնածուները, ում օգտին տրվել են առավելագույն ձայներ:

-եթե թեկնածուների ստացած ձայների հավասարությունը թույլ չի տալիս որոշել Խորհրդի կազմում նրանց ընտրվելու հարցը, կազմակերպվում է նոր քվեարկություն, որի ժամանակ քվեարկվում են միայն այդ թեկնածուները:

-նոր քվեարկության ժամանակ քվեարկողներից յուրաքանչյուրը կարող է քվեարկել թեկնածուներից միայն մեկի օգտին:

6.Քվեարկության արդյունքներում ստացած ձայների թիվը Խորհրդի ընտրված անդամի համար որևէ հատուկ կարգավիճակ չի առաջացնում:

7.Ընտրված Խորհրդի կողմից նշանակվում է Խորհրդի համակարգող: Խորհրդի համակարգողը նշանակվում է Խորհրդի անդամներից` նրանց ազգանունների այբբենական հերթականությամբ` մեկ ամիս ժամկետով: Այդ ժամկետը համակարգողներից յուրաքանչյուրի համար կարող է երկարացվել Խորհրդի որոշմամբ, բայց ոչ ավելի, քան մեկ ամսով:

8.Խորհրդի համակարգողը իրականացնում է Խորհրդի աշխատանքների ընթացիկ կազմակերպումը: Խորհրդի համակարգողը Խորհրդի կողմից որոշումների ընդունման ժամանակ որոշիչ ձայն չունի:

9.Խորհրդի համակարգողը վարում է Ժողովը, Խորհրդի նիստերը, ստորագրում է Խորհրդի ընդունած որոշումները, այլ փաստաթղթեր, արձանագրություններ:

10.Կազմակերպության տնօրենին (այսուհետ` Տնօրեն) ընտրում է Ժողովը:

11.Ժողովի վճռական ձայնով մասնակիցների կողմից առաջարկվում են Տնօրենի թեկնածություններ: Եթե առաջադրվել է Տնօրենի մեկ թեկնածու, ապա վերջինս համարվում է ընտրված Տնօրեն: Մեկից ավելի թեկնածու առաջադրվելու դեպքում կազմակերպվում է բաց քվեարկություն: Տնօրենն ընտրվում է իրավազոր Ժողովի վճռական ձայնով մասնակիցների ձայների պարզ մեծամասնությամբ:

12.Ձայների հավասարության դեպքում որոշիչ են համարվում Խորհրդի անդամների ձայները:

ԿԱԶՄԱԿԵՐՊՈՒԹՅԱՆ ԽՈՐՀՈՒՐԴԸ